جوالة يعني ايه ؟

حفلة ختام نشاط الجوالة 2016

جواله يعني ايه ؟

بص يا سيدي اول حاجه لازم تعرفها ان الجواله مش أسره ( الجواله عشيرة )
واحد هيسألني و يقولي ايه الفرق بين أي أسره و بين عشيرة الجواله , اقوله الأسره بيبقى نشاطها مكتفي بالكليه بس , إنما عشيرة الجواله نشاط على مستوى الجامعه يعني ممكن تقابل صاحبك اللي ف جوالة تجاره حلوان او آداب حلوان او اي كليه تانيه و مش بس على مستوى جامعه حلوان ده على مستوى جامعات مصر يعني قدرنا بإسم فنون تطبيقية نمثل جامعة حلوان على مستوى الجمهوريه في منتخبات الإسكندرية و في أسبوع الشباب العاشر بقناة السويس , و غيرها من اللقاءات زي جنوب الوادي و حاجات كتير كده

و في ناس بتمثل مصر في الوطن العربي , يعني طلع منتخب من جامعات مصر يمثل الجمهوريه في المغرب السنه دي 2016

- طب في فرق تاني بين أي أسره و عشيرة الجواله ؟

أيوه طبعا الأسره بتتكون من مجموعه اصحاب بيقعدوا مع بعض كتير هوبا طقت ف دماغهم ياله نعمل أسره قاموا عملوا اسره و عملولها منهج و كده بقى انما عشيرة الجواله كيان عالمي و دلوقتي بنحتفل بمرور 104 سنه على الكشافه في مصر

ده غير أهم فرق تعالى و أقولك ع الكبيره بقى ، في اتحاد الطلبه في لجنه اسمها أسر
يعني كل الأسر اللي ف الكليه دي الـ 6 ولا الـ 7 أسر كلهم كلهم واخدين لجنه ع الجانب المقابل هتلاقي عشيرة الجواله و لوحدها واخده لجنه كامله بسلطاتها ببابا غنوجها بكل حاجتها ( السيطرة حلوه مافيش كلام ;) )

-انا عارف انك دلوقتي بتقولي كل الكلام ده جميل بس انا برضه معرفتش جواله يعني ايه ؟

استنى بس عليا مبوراحه يا عم مش هينفع كده

بص بقى O.O
الجواله هدفها الخدمه العامه يعني ايه الخدمه العامه دي ، الخدمه العامه دي يعني بنشوف الناس محتاجه ايه و بنحاول بقدر الامكان نعمله ف مشاريع خدمه عامه داخل الكليه أو ف الجامعه زي تشجير مكان أو دهان مكان تاني أو توضيب مكان تالت أو مساعده الناس اللي داخله الكليه جديد و شرح المواد الصعبه عليهم أو حتى عن طريق حملات توعيه و غيرها و غيرها من مشاريع الخدمه العامه

-آها فهمت يعني الجواله خدمه عامه و بس صح

لأ طبعا مش صح انا لسه جايلك ف الطريق اهو انا كنت باخد نفسي بس و اكمل كلامي الكلام كتير يا عم وانا بنهج بسرعه :)

الجواله كل شويه بتطور من نفسها يعني بيبقى عندنا مسابقات ثقافيه و فنيه و كشفيه و دينية و ... و .... و بيبقى عندنا ورش تعليم الرسم ع الزجاج و دق النحاس و الألومنيوم و تقبيبه و حرق الجلد و الأركيت و فن المكرميه و ازاي تستغل خامات البيئه ف صنع حاجات مفيده , ده غير المعسكرات اللي بنطلعها و المهرجان السنوي اللي بنتنافس فيه مع كل كليات جامعه حلوان و بنتعلم حياة الخلاء و ازاي الواحد يقدر ينصب الخيمه بتاعته و ازاي يقدر يعمل كل مستلزمات حياته و يبني دولابه و سريره و كراسيه و جزامته و الشناطه بتاعته و كل حاجته بإستخدام حاجتين بس الشوم و الحبال بربطات معينه طبعا ;) ، و ازاي يقدر يفك شفرات الرحله الخلويه و يحدد اتجاه الرياح و سرعتها و يحدد اتجاه الشمال عن طريق النجوم او عن طريق الشمس و ازاي يقدر يعرف مكان بالبوصله و ازاي يقدر يقيس ارتفاع طول مبنى بعصايه صغيره و ازاي يعمل نار للطهي الخلوي و ازاي يقدر يعمل الإسعافات الأوليه بأدوات بسيطه جدا و حياة الخلاء عموما ده غير فقرات السمر و الأغاني اللي احنا بنألفها و بنتلف حوالين النار ف حلقة السمر و صوت الدف و هو بيلحن أحلى موسيقى للأغاني و حاجات كتير اوي هنتعلمها ف الجوالة , ( و طبعا البنات مش بتبات ف المعسكرات دي , بتيجي كل يوم , أما الولاد بقى أنتوا مش هتشوفوا البيت بتاعكوا تاني :D )

ده غير بقى ان اللي بيشترك ف الجواله بيبقى ليه عضويه ف نادي الكشفافه البحريه حارس ف الدقي

بصوا انا اتكلمت كتير أي نعم في كلام اكتر عاوزه اقوله عن الجواله بس كفايه كده عشان مبقاش رغاي :D

-طب استنى استنى قبل ما تقفل انا لو عاوز اشترك معاكوا اعمل ايه ؟

-كل اللي عليك تسأل عن برجولة الجوالة ف أول يوم دراسه و تملى الإستماره بتاعتنا و بعد كده ف أول اجتماع لينا هنقول مين الناس اللي بقت معانا ف الجواله

و تابعنا على أكونت الجوالة ( Applied arts scout )

www.fb.com/scouting.arts

#الجواله_مش_أسرة
#الجواله_عشيرة
#الجواله_أسلوب_حياة

#عيشها_جوالة